Ұлы дала елі: кең көлемді кітап көрмесі

Ағымдағы жылдың 8 желтоқсаны күні сағат 11:00-де Абай атындағы кітапханада ҚР Тәуелсіздігінің 25 жылдығына арналған «25 жұлдызды күн» шеңберінде «Ұлы дала елі» тақырыбында кең көлемді кітап көрмесі ұйымдастырылды. Көрменің мақсаты: Тәуелсіздік алғаннан кейінгі Қазақстанның дербес мемлекет ретінде қалыптасу тарихына шолу жасау, сындарлы жылдар ішінде Қазақстан Республикасының Тұңғыш Президенті Н.Ә. Назарбаевтың кемел саясаты мен ерен еңбегі арқасында еліміздің жеткен жетістіктері мен толағай табыстарын, сондай-ақ қазақстандық қоғамдағы саяси, экономикалық, әлеуметтік және рухани игі өзгерістер белесін көпшілікке таныту. Кітап көрмесі Қазақ хандығының іргесін қалаған Керей мен Жәнібек хандардан бастап бүгінгі Тәуелсіздігіміздің Тұңғыш Президенті Н.Ә. Назарбаевтың елге сіңірген еңбектерін баяндайтын «Ұлы дала мемлекеттері», «Күмбірлеп көне дәуір сыр шертеді», «Жыраулар поэзиясы – жырдың мөлдір бастауы», «Әдебиет – тарих айнасы», «Семей және Алаш», «Тәуелсіздік – еліміздің ерлік жолы» бөлімдерінен тұрды. Шараға «Авиценна» колледжінің студенттері қатысып, көрмедегі Н.Назарбаевтың «Халыққа арнау», Қ.Сартқожаның «Орхон мұралары», Қ.Игісіннің «Ұлы дала», Б.Б.Кәрімовтың «Қазақ тарихының құрылу тарихы» және «Алаш идеясы», «XXI – ғасырдағы алаштың ақ жолы», «Алаш көсемі», «Бабалар сөзі», «Елбасы және мәдениет», «Казахстан сегодня», «Древо независимости: от единства к процветанию», «Елін сүйген елі сүйген елбасы» кітаптарына ерекше назар аударды.