Бір шаңырақ астында: этнографиялық кеш

Абай атындағы кітапхананың қызметкерлері 1 мамыр – Қазақстан халықтарының бірлігі күніне арнап «Бір шаңырақ астында» тақырыбында этнографиялық кеш ұйымдастырды. Аталмыш кеш ағылшын тілінде өткізілді. Іс–шараға Семей медициналық университетінің шетелдік студенттері, неміс және татар мәдени орталықтары қатысты.
Кеш барысында кітапхана қызметкерлері шетелдік студенттерге мерекенің шығу тарихы туралы ақпарат беріп, мемлекетімізде тұрып жатқан басқа ұлт өкілдерінің мәдениеті мен салт-дәстүрі, ұлттық тағамдары, музыкалық аспаптары жайында әңгімеледі. Студенттер «Сабантой», «Пасха» мерекелерінің ерешелігімен танысып, орыс ұлтының халық арасына кең таралған «Ручеек» ойынын бірігіп ойнады.
Аталмыш кешке арнайы шақырылған мәдени орталықтың мүшелері А.Валериева, Д.Аманғали ән салып, көпшілікке әдемі көңіл күй сыйласа, шетелдік студенттер Musaffar Tabinda мен Noor Eman өз елдері жайында сыр шертетін слайд көрсетілімін көпшілікке паш етіп, үнділік студент Bafanda Bazila Parvaiz өз елінің халық әнін орындады.
Мерекелік кешке қатысушыларды «Қазақстан – қара шаңырағым» атты кең көлемді кітап көрмесі қарсы алды. Қонақтар көрмедегі «Қазақстан халықтары» энциклопедиясы , «Қазақстан халық ассамблеясы», «Достық өмір сүретін үй» сынды кітаптарға аса назар аударып, жақын танысты.
Бір шаңырақ астында тұрып жатқан барша халықты айтулы мерекемен шын жүректен құттықтаймыз!