Тіл байлығы – ой байлығы: танымдық сағат

Жыл сайын елімізде 22 қыркүйек – Қазақстан Республикасы халықтарының тілдері күні аталып өтіледі. Аталмыш мерекенің құрметіне орай Абай атындағы кітапхананың шетел әдебиеттер бөлімі қызметкерлері қыркүйектің 20- жұлдызы күні қаламыздағы Олимпиада резерві аймақтық спорт колледжінің студенттері үшін арнайы «Тіл байлығы – ой байлығы» атты танымдық сағат ұйымдастырды. Іс- шара барысында студенттерге осы мейрамды өздері қалай түсінетіндіктері туралы ойларын ортаға салу ұсынылды. Қатысушылар тілге деген құрмет ретінде  пікірлерін, көзқарастарын әңгімелесе, Тынысбек Аружан «Ана тілім» атты өлең шумақтарын жатқа айтып, Тіл күніне тарту жасады. Студенттер «Сен тілді қаншалықты білесің?» викториналық ойынына қатысып, тілге қатысты қызықты мәліметтермен танысты.

Іс-шара әрі қарай мақал- мәтелдер, жұмбақ, жаңылтпаштар байқауымен өз жалғасын тапты. Қазақ, орыс, ағылшын тілдерінде ұйымдастырылған байқауға Эльдар Раджанов, Әнуар Макренов, Екатерина Шелудянова, Әділ Кенжалинов, Еркебұлан Кизатов сынды студенттер ерекше ынтамен қатысып, терең білімдері мен асқан қызығушылықтарын таныта білді.

Ұйымдастырылған байқауларға белсенділік көрсеткен қатысушыларға кітапхана атынан ағылшын тілінде әдеби кітаптар сыйға тартылды. Іс- шара соңында  студенттер кітапхана қызметкерлеріне осындай іс-шара ұйымдастырғандары үшін өз алғыстарын білдіріп, мерекелік көңіл-күймен тарқасты.