Ел үмітін-ер ақтар, Ер есімін-ел сақтар! – кең көлемді кітап көрмесі
6 мамыр күні Абай атындағы кітапханасы кітапхана оқырмандарына 9 – Мамыр Ұлы Жеңістің 76 жылдық мерекесіне орай Ұлы Отан соғысы кезіндегі халқымыздың ержүректілігі мен төзімділігін паш ету мақсатында «Ел үмітін – ер ақтар, Ер есімін – ел сақтар!» атты тақырыпта кең көлемді кітап көрмесін ұйымдастырды.
Көрме «Ұлы Отан соғысы көркем әдебиетте», «Қаһарлы жылдар мерзімді басылымдарда», «Отты жылдар әуендері», «Семейліктер Ұлы Отан соғысы жылдарында», «Ұлы Жеңіс жырлары», «Қаһарлы жылдар жылнамасы», «Ұлы Отан соғысы: естеліктер мен мемуарлар» атты 6 бөлімнен тұрады.
Көрме ерекше батырлық, жүректілік, батылдық танытқан Семейлік Кеңес Одағының батырлары туралы ақпараттар, қаламгер майдангерлердің соғыс жайында жазылған көркем туындыларымен, Ұлы Отан соғысы жайында жазылған көркем-әдебиеттермен толыққанды таныстырады.
Кітап көрмесіндегі «Семейліктер Ұлы Отан соғысы жылдарында» атты бөлімге Ұлы Отан соғысы жылдарындағы Семейдің тарихын, семейліктердің Жеңіске қосқан үлесін, Семейде құрылған дивизиялар, тыл еңбеккерлері майдан үшін жан аямай атқарған ерлік істері, Семейлік Кеңес Одағының Батырлары, Семейлік майдангер-жазушылар туралы тың мәліметтер мен фотоматериалдар қойылды.
Кітап көрмесін таныстыру барысында кітапхана мамандары Ұлы Отан соғысы туралы, 1941 жылы Семей қаласында жасақталған екі дивизия: 8-ші және 238–ші атқыштар дивизиялары, олардың майдан даласындағы жанқиярлық ерліктері; тыл еңбеккерлерінің табандылықтары, соғыс кезінде Семейге эвакуацияланған әскери госпитальдар туралы, семейлік 53 Ұлы Отан соғысының Батырлары олардың соғыстағы жасаған ерліктеріне тоқталды.
Әрбір бөлімде қойылған ардагерлеріміздің ерлігін паш ететін көркем, поэзиялық, деректі әдебиеттермен бірге соғыс жылдарында 1943-44 жылдары жарық көрген басылымдар «Екпінді», «Прииртышская правда» беттеріндегі жерлестеріміздің майдан шебіндегі ерліктері, майдан үшін еңбек еткен тылдағы еңбекшілердің майдан қажетіне үлес қосып, фашизмді жеңіп шығуға қосқан үлесі жайында жазылған мақалалар оқырман қызығушылығын туғызды.
