Чернобыль куәгерлер естеліктерінен: еске алу күні
Чернобыль Атом электр станциясы апатының 30 жылдығына арналып 15 сәуір күні «Жанұя орталығы» қоғамдық қоры, «Чернобыль мүгедектерінің еркін қоғамы» қоғамдық қоры мен Абай атындағы кітапхана бірлесіп , «Чернобыль көргендер естеліктерінен» атты еске алу күнін өткізді.
Іс-шараға Чернобыль апатында қатысқан семейлік азаматтар, Чернобыль апатында қайтыс болған азаматтардың жесірлері, ішкі саясат бөлімінің бастығы, қалалық маслихаттың депутаттары, Радиациялық медицина және экология ғылыми зерттеу институтының мамандары, медицина университетінің қызметкерлері, үкіметтік емес ұйымдардың өкілдері қатысып, Чернобыль тақырыбындағы мәселелерді көтерді.
Басқосу қазір арамызда жоқ сол сұрапыл оқиға куәгерлерінің рухына тағзым етіліп, жиналғандарға құрмет көрсетуден басталды. Бұдан отыз жыл бұрын 1986 жылғы 26 сәуірде Чернобыль атом-электр стансасында болған бұл апатты ауыздықтауға сол кездегі кеңестер одағы құрамындағы республикалар түгел атсалысқаны мәлім. Бұл атом энергетикасы пайда болғаннан бергі уақыттағы ең үлкен апат болатын. Ол мыңдаған адамдардың өмірін үзіп кетті. Осы апатты ауыздықтауға қатысқан 800 мың адамның 32 мыңы қазақстандықтар еді. Жыл өткен сайын олардың қатары сиреп барады. Қазіргі таңда Қазақстанда Чернобыль апатын жоюға қатысқан 5 мыңға жуық адам бар. Олардың басым бөлігі жазылмайтын сәуле ауруларына ұшыраған дімкәс жандар.
Іс-шара барысында Семей медициналық университетінің доценті Мадиева Мадина Рашидқызының «Радиацияның биологиялық әсерін заманауи бағалау» тақырыбында дайындалған презентациясына шолу жасалынды. Осы кешке қатысқан М.Әуезов атындағы педагогикалық колледжі студенті өзінің жүрек жарды «Чернобыль ардагері-ағалар туралы» балладасын оқыса, «Қайнар» колледжінің білім алушы жастары Қазақстан туралы, отаншылдық рухтағы өлең жолдарын оқып берді. «Жанұя орталығы» қоғамдық қорының жетекшісі Асташкина Людмила Михайловна кешті қорытындылап, осы іс-шараның жоғары деңгейде өтуіне қолдау көрсетіп, белсенділік танытқан ұйымдастырушыларға, келген көпшілік қауымға алғыс білдірді.
Сонымен қатар, іс-шара тақырыбына арналып кітап қорындағы әдебиеттерден «Чернобыль-ғасыр қасіреті» атты көрме жасақталды. Көрмеге жауынгер-залалсыздандырушылар киген эксперименттік әскери киім, радиациядан қорғайтын міндетті жеке қорғаныс құралдары – газтұтқыш және респиратор, фотоқұжаттар, сонымен қатар қатысушылардың марапаттары қойылады және кітап қорындағы Чернобыль тақырыбындағы шыққан кітаптар, мерзімді басылымдар, интернет ресурстардан қойылып, шолу өткізілді.